Bekzod Qurbonov va Bobur Valijonov Moskvadagi xalqaro musobaqada navbatdagi gʻalabalarini tantana qilishdi
Rossiyadagi “Maxima Park” ot sporti klubida “Maxima Masters” musobaqasining 15-bosqichi boʻlib oʻtdi. Kuchli chavandozlar orasida kechgan raqobatda hamyurtlarimiz ham muvaffaqiyatli ishtirok etib, bir qator yoʻnalishlarda gʻoliblikni qoʻlga kiritishdi.
Jumladan, terma jamoamiz sardori Bekzod Qurbonov “Matts” laqabli tulporida Gran-pri yoʻnalishida eng yaxshi natijani qayd etdi. 140 sm balandlikdagi “Oltin tur” yoʻnalishida vakilimizga teng keladigan raqib topilmadi. Shuningdek, Qurbonov “Kumush tur” (130 sm) yoʻnalishida “Kalibri” oti bilan ikkinchi oʻringa sazovor boʻldi.
Musobaqada alohida ahamiyat kasb etgan “Kelajak turi” dasturida Boburjon Valijonovning chiqishi koʻpchilikning eʼtiborida boʻldi. “Samira” laqabli otda 110 sm balandlikdagi toʻsiqlardan oʻtish dasturida Valijonov mutlaq gʻalabani tantana qildi.
