AQShning Alabama shtati, Birmingem shahrida o‘tkazilayotgan Butunjahon o‘yinlaridan xushxabar. Karatechimiz Dostonbek Otabolayev delegatsiyamizning ushbu musobaqadagi ilk medaliga mualliflik qildi.

-75 kg vazn toifasida bahs olib borgan Otabolayev guruh bosqichidan muvaffaqiyatli o‘tib, yarim finalda ukrainalik Stanislav Xorunaga imkoniyatni boy berib qo‘ydi. Shundan so‘ng bronza medali uchun kechgan jangda amerikalik Tomas Skottni mag‘lubiyatga uchratib, uchinchi o‘rin sohibiga aylandi.

O‘zbekiston Milliy Olimpiya qo‘mitasi delegatsiyamiz va karatechimizni, millionlab muxlislarimizni ushbu muvaffaqiyat bilan qutlab, kelgusi kun dasturlarida bellashadigan atletlarimizga ham omad va zafarlar tilab qoladi.