Shu kunlarda Bahraynda sport kurashlari boʻyicha yoshlar oʻrtasida qitʼa birinchiligi oʻtkazilayotgani haqida xabar bergan edik. Musobaqada yunon-rum kurashchilarimiz oʻz chiqishlarini 5 ta medal bilan yakunlashdi.

Ikkinchi kun dasturida 97 kg vazn toifasidagi polvonimiz Islomjon Rahmatov bronza medaliga sazovor boʻldi. U uchinchi oʻrin uchun kechgan kurashda koreyalik Kim Ju Vanni 12-3 hisobida dogʻda qoldirib, Osiyo chempionati sovrindoriga aylandi. Afsuski, bronza medali uchun kechgan yana 2 bellashuvda hamyurtlarimiz imkoniyatni boy berib qoʻyishdi.

Shu tariqa, yunon-rum kurashi boʻyicha yoshlar terma jamoamiz Osiyo chempionatini 1 ta oltin, 2 ta kumush, 2 ta bronza medali bilan yakunladi. Musobaqa bugun ayollar kurashi dasturi bilan davom etadi.