Ma’lum qilganimizdek, bugun “Olimpik” Coca Cola Superligasining 10-tur qoldirilgan uchrashuvi doirasida “Navbahor”ni qabul qildi. Murosasiz kechgan bellashuvda jamoamiz peshqadam bilan murosa ko‘chasini tanladi.

Uchrashuvning ikkinchi daqiqasidayoq Jamshid Iskanderov mehmonlarni hisobda oldinga olib chiqdi. Birinchi bo‘lim yakunlanayotgan pallada Po‘latxo‘ja Xoldorxonov oradagi muvozanatni tikladi. Ikkinchi taymda jamoalar har qancha harakat qilishmasin, darvozalarga boshqa to‘p kiritilmadi va klublar o‘z hisoblariga bittadan ochko qo‘shib qo‘yishdi.

Coca Cola Superligasi, 10-tur
“Olimpik” – “Navbahor” 1:1
Gollar: Po‘latxo‘ja Xoldorxonov 39' – Jamshid Iskanderov 2'.

Shu tariqa, Temur Kapadze shogirdlari ochkolarini 14 taga yetkazib olishmoqda. Bugungi natija bilan “Olimpik” birinchi davrani sakkizinchi pog‘onada yakunlaydigan bo‘ldi. Qisqa tanaffusdan so‘ng, aniqrog‘i 1 avgustdan boshlab 14-tur o‘yinlariga start beriladi.