Andrey Abduvaliyevni tabriklaymiz!
Bugun Oʻzbekiston yengil atletika federatsiyasi raisining oʻrinbosari, Olimpiada chempioni Andrey Abduvaliyev oʻz tavallud ayyomini nishonlamoqda.
Andrey Hakimovich Abduvaliyev 1966-yil 30-iyun kuni tugʻilgan. Yengil atletikaning bosqon uloqtirish yoʻnalishi boʻyicha Barselona-1992 Olimpiya oʻyinlari chempioni. Andrey Hakimovich, shuningdek, 1993-yil Shtutgart va 1995-yil Gyoteborgda oʻtgan jahon chempionatlari gʻolibi, Osiyo chempioni va Osiyo oʻyinlari sovrindori ham sanaladi.
Xizmat koʻrsatgan sport ustasi unvonini qoʻlga kiritgan Andrey Abduvaliyev 2000-yilda sportchilik faoliyatini tugatgan. Bir necha yil mamlakat yengil atletika federatsiyasi raisi sifatida samarali mehnat qilgan. Hozirda Oʻzbekiston yengil atletika federatsiyasi raisining oʻrinbosari va Osiyo yengil atletika assotsiatsiyasi vitse-prezidenti lavozimlarida ish olib bormoqda. 2021-yil davlatimiz tomonidan “Sodiq xizmatlari uchun” medali bilan taqdirlangan.
Oʻzbekiston Milliy Olimpiya qoʻmitasi Andrey Abduvaliyevni bugungi tavallud ayyomi bilan tabriklab, u kishiga uzoq umr va sihat-salomatlik tilab qoladi.
