24-27 iyun kunlari Koreya Respublikasi taekvondo WT bo‘yicha navbatdagi Osiyo chempionligiga mezbonlik qildi. Qit’amizning eng kuchli taekvondochilari qatnashgan mazkur musobaqada terma jamoamiz 4 ta oltin, 1 ta kumush va 2 ta bronza, jami 7 ta medal qo‘lga kiritdi. 

Mazkur turnir bir qator yangi nomlarni kashf qilib berdi. Ular orasida o‘zining ajoyib texnikasi va harakatlari bilan ajralib turgan Jasur Jaysunovning ishtiroki mutaxassislar tomonidan alohida e’tirof etildi. -74 kg vazn toifasida oltin medalni qo‘lga kiritgan Jaysunov musobaqaning “Eng yaxshi erkak sportchisi” deb topildi. 

Taekvondo bo‘yicha Osiyo chempionatlarida koreyalik sportchilar erkaklar o‘rtasida muntazam ravishda umumjamoa hisobida birinchi o‘rinni qo‘lga kiritib kelishgan. Biroq bu yil, yanada e’tiborlisi, ushbu sport vatanida o‘tgan qit’a birinchiligida ushbu an’anaga barham berildi. Bunday olamshumul natijani bizning jamoa amalga oshirgani bilan ko‘nglimiz yana bir karra faxr hissini tuymoqda. Shubhasiz, o‘z tarixida ilk bor Osiyo birinchiligida 4 ta oltin medal jamg‘argan erkaklar jamoamizning ustozi Pavel Xan “Eng yaxshi murabbiy” sifatida tan olindi.