27 Iyun 2022 2062

Taekvondochi yigitlarimizdan tarixiy natija! Ular koreyaliklarni umumjamoa hisobida ortda qoldirishdi

Koreya Respublikasida taekvondo WT boʻyicha Osiyo chempionati oʻz yakuniga yetdi. Bugun -80 kg vazn toifasida ishtirok etgan hamyurtimiz Shuhrat Salayev qitʼa chempionligini qoʻlga kiritdi.

Taekvondochimiz finalda Tokio-2020 kumush medal sohibi iordaniyalik Solih El Sharabati bilan toʻqnash keldi. Birinchi raundda Salayevning, ikkinchi boʻlimda raqibning gʻalabasi qayd etildi. Hal qiluvchi raundda Salayev 0:5 hisobida ortda borayotganiga qaramasdan kuchli xarakter koʻrsatib, 8:7 hisobida bellashuv taqdirini oʻz foydasiga hal qila oldi. Ayniqsa, soʻnggi 2 soniyada 2 ochkolik zarba bilan gʻalabani “ilib” ketgani butun musobaqaning eng dramatik lahzasi boʻldi, deyish mumkin.

Shu tariqa, terma jamoamiz mazkur qitʼa birinchiligini 4 ta oltin, 1 ta kumush va 2 ta bronza medallari bilan yakunladi. Ahamiyatli tomoni, erkaklar terma jamoamiz 4 ta oltin medal bilan musobaqa mezbonlarini ortda qoldirib, umumjamoa hisobida birinchi oʻrinni egallashdi. Qayd etish joiz, terma jamoamiz qitʼa birinchiliklarida shu paytgacha 4 ta oltin medal qoʻlga kiritmagan edi.

Oʻzbekiston Milliy Olimpiya qoʻmitasi taekvondochilarimizning ushbu tarixiy natijasi bilan Oʻzbekiston taekvondo WT assotsiatsiyasi va jamoamizni, murabbiylar shtabini samimiy qutlaydi.

Text to speech