“Derbi”da Obidxon gʻalaba qozondi, Gulnozada bronza
Ulan-Bator shahri mezbonlik qilayotgan dzyudo boʻyicha “Katta dubulgʻa” musobaqasida ikkinchi kun bellashuvlari oʻz yakuniga yetmoqda. Ushbu kun dasturida 2 nafar vakilimiz shohsupaga koʻtarilishdi.
Maʼlum qilganimizdek, -73 kg vazn toifasida bronza medali uchun kechgan juftliklardan birida Obidxon Noʻmonov hamda Shahram Ahadov toʻqnash kelishdi. Qoʻshimcha daqiqagacha choʻzilgan bellashuvda Ahadovning 3 ta ogohlantirish olishi Obidxonga bronza medalini taqdim qildi.
Shuningdek, ikki Olimpiya oʻyinlarida qatnashgan Gulnoza Matniyazova uchinchi oʻrin uchun kechgan bellashuvda qozogʻistonlik Zere Bekteskizidan ustun kelib, “Katta dubulgʻa” turnirlaridagi medallari sonini 3 taga yetkazib oldi.
Qayd etish joiz, oʻz gʻalabalari orqali Noʻmonov hamda Matniyazova Parij-2024 Olimpiya oʻyinlari uchun oʻz hisoblariga 500 reyting ochkosini yozib qoʻyishdi.
