Ikki nafar futbol fidoiysi rasman Oʻzbekiston sport faxriylari qatoriga kirdi
Bugun sportimizning taniqli faxriylari bir davrada jam boʻlishdi. Oʻzbekiston Milliy Olimpiya qoʻmitasida oʻtgan uchrashuvda mamlakat sport faxriylari kengashi raisi Bahodir Maxsitov boshchiligidagi sportimiz dargʻalari ishtirok etishdi.
Faxriylarimiz suhbat davomida hukumatimiz tomonidan ushbu sohani yanada rivojlantirish boʻyicha olib borilayotgan ishlar, yoshlar uchun yaratilgan sharoitlar haqida suhbatlashishar ekan, atletlarimiz bundan unumli foydalangan holda xalqaro maydonda yurt shaʼnini munosib himoya qilishlari zarurligini taʼkidlashdi.
Ushbu yigʻilish yana ikki nafar sportimiz fidoiysiga “Oʻzbekiston sport faxriysi” koʻkrak nishonini topshirish tadbiriga ulanib ketdi. Unda taniqli futbol mutaxassislari, uzoq yillar oʻzbek futboliga bir qator isteʼdodli oʻyinchilarni yetishtirib bergan Botirxon va Yusupjon Ibragimovlar koʻkrak nishonlarini qabul qilib olishdi.
Uchrashuv yakunida faxriylarimiz mamlakatimiz sporti uchun hamisha qoʻllaridan kelgan yordamni ayamaslikka tayyor ekanini bildirishdi.
