Oʻzbek ogʻir atletikasining yangi “qaldirgʻoch”lari parvozga shay
Ayni kunlarda Meksikaning Leon shahrida oʻsmirlar oʻrtasida ogʻir atletika boʻyicha jahon chempionati boʻlib oʻtmoqda. 40 ga yaqin mamlakatdan 200 nafardan ortiq sportchi ishtirok etayotgan mazkur musobaqada terma jamoamiz vakillari ham yurtimiz sharafini himoya qilishadi.
Oʻzbekiston ogʻir atletika federatsiyasining maʼlum qilishicha, tajribali murabbiy Nurullo Togʻayev boshchiligida 4 nafar sportchimiz jahon chempionati medallari uchun kurash olib boradi. 18-iyunga qadar davom etadigan dunyo birinchiligida hamyurtlarimizning ishtiroki quyidagi sanalarga belgilangan:
14-iyun: Diyorbek Ermatov (-73 kg), 22:00;
16-iyun: Nigora Suvonova (-76 kg), 01:00;
17-iyun: Abrorbek Maʼrufbekov (-96 kg), 04:00;
18-iyun: Qudratbek Salimjonov (-102 kg), 04:00.
Dasturlar Toshkent vaqti bilan koʻrsatilgan.
Oʻzbekiston Milliy Olimpiya qoʻmitasi boʻlajak musobaqada ishtirok etadigan barcha sportchilarimizga omad va gʻalabalar tilab qoladi.
