Ma’lumki, 6-13 oktyabr kunlari poytaxtimiz dzyudo bo‘yicha kattalar o‘rtasidagi jahon chempionatiga mezbonlik qiladi. Sakkiz kun davomida dunyoning eng kuchli dzyudochilari «Humo Arena» tatamilarida jahon chempionati medallari hamda qimmatli reyting ochkolari uchun o‘zaro bellashadilar. Ayni paytda yurtimizda ilk bor tashkil etilayotgan bo‘lajak dunyo birinchiligiga katta tayyorgarlik ishlari olib borilyapti.

Xususan, bugun Xalqaro dzyudo federatsiyasi (IJF) mutasaddilari jahon chempionati o‘tkaziluvchi «Humo Arena»ni ko‘zdan kechirishdi. IJF bosh referi direktori Armen Bagdasarov va tashkilot Sport qo‘mitasi kotibi Abdulla Muradov asosiy bellashuvlar hamda mashg‘ulot o‘tkaziladigan zal, kiyinish-yechinish xonalari, matbuot anjumani, flesh intervyu uchun mo‘ljallangan mikst-zona va musobaqaga xizmat qiladigan boshqa ob’ektlar bilan yaqindan tanishishdi.

IJF mutasaddilari O‘zbekiston dzyudo federatsiyasi qoshida tuzilgan Ishchi guruhga o‘z tavsiyalarini berishdi.