Diyorimizda oʻtkazilayotgan futbol boʻyicha U23 Osiyo kubogida 3-tur bahslari oʻtkazilmoqda. Hozirgina yakunlangan “В” guruhi bellashuvlaridan soʻng yoshlarimizning chorak finaldagi raqibi maʼlum boʻldi.

Xabaringiz bor, Temur Kapadze shogirdlari 2-turdan soʻng muddatidan avval “A” guruhi peshqadamligini hal qilib boʻlgan edi. Reglamentga koʻra, yoshlarimiz “В” guruhida ikkinchi oʻrinni qoʻlga kiritgan jamoa bilan chorak finalda toʻqnash keladi. Bugun oʻtkazilgan bahslardan soʻng qoʻshni kvartetda Iroq yoshlar terma jamoasi ikkinchi oʻrin bilan pley-off yoʻllanmasiga sazovor boʻldi.

Maʼlumot uchun, Oʻzbekiston va Iroq U23 terma jamoalarining yarim final yoʻlidagi bahsi 11-iyun kuni soat 21:00 da “Paxtakor” markaziy stadionida start oladi.