Bugun yurtimiz Olimpiya harakatining faol ishtirokchilaridan biri, Oʻzbekiston Milliy Olimpiya qoʻmitasining yaqin hamkori, professional fotograf Anvar Ilyasov tavallud ayyomini nishonlamoqda.

Anvar Ilyasov 1964-yil 26-may kuni dunyoga kelgan. Professional fotograf sifatida delegatsiyamiz bilan 6 ta yozgi Olimpiya oʻyinlarida (Sidney-2000, Afina-2004, Pekin-2008, London-2012, Rio-2016, Tokio-2020), shuningdek, 5 ta Osiyo oʻyinlari (Pusan-2002, Doxa-2006, Guanchjou-2010, Incheon-2014, Jakarta-2018), Buenos-Ayres-2018 oʻsmirlar Olimpiadasi, sport kurashlari, (Toshkent-2014, Nur-Sultan-2019), boks (Olma-ota-2013), dzyudo (Parij-2011) boʻyicha jahon chempionatlarida, 2018-yil Rossiya yashil maydonlarida oʻtgan futbol mundialida ham ishlagan.

Atletlarimizning ana shunday yirik musobaqalardagi eng yorqin lahzalari muhrlangan suratlarning aksariyati ushbu fotograf ijodiga mansub. Anvar Ilyasov 2015-yil “Oltin qalam” Milliy mukofotida “Eng yaxshi fotograf” nominatsiyada gʻolib boʻlgan. Shuningdek, oʻsha yili Rossiyada oʻtgan “Energiya Pobed-2015” xalqaro tanlovida oltin medalni qoʻlga kiritgan. 2016-yil FILA (hozirgi UWW) tashkilotining maxsus sovriniga loyiq koʻrilgan. Sohada erishgan muvaffaqiyatlari evaziga davlatimiz tomonidan “Doʻstlik” ordeni bilan taqdirlangan.

Oʻzbekiston Milliy Olimpiya qoʻmitasi Anvar Ilyasovni tavallud ayyomi bilan tabriklab, u kishiga uzoq umr, sihat-salomatlik va ulkan muvaffaqiyatlar tilab qoladi.