Shanxay Hamkorlik Tashkilotiga aʼzo mamlakat vakillarining jismoniy tarbiya va sport boʻyicha vazirlik hamda idoralari rahbarlari ishtirokidagi yigʻilishga tashrif buyurayotgan mehmonlar kelishda davom etmoqda. Bugun Rossiya Federatsiyasi Sport vaziri Oleg Matitsin, Qozogʻiston madaniyat va sport ishlari vaziri oʻrinbosari Serik Jarasbayev rahbarligidagi delegatsiyalar poytaxtimizga yetib keldi.

Yuqori martabali shaxslarni Adham Ikramov boshchiligidagi Sportni rivojlantirish vazirligi mutasaddilari Islom Karimov nomidagi Toshkent xalqaro aeroportida iliq qarshi olishdi. Qayd etish joiz, mehmonlar boʻlajak yigʻilish tashkilot tomonidan olib borilayotgan rivojlanish strategiyalariga jismoniy tarbiya va sport sohasida salmoqli hissa qoʻshishini alohida taʼkidlashdi.

Ertaga boʻlib oʻtadigan asosiy yigʻilish kun tartibidan kelgusida rejalashtirilgan yuqori darajadagi sport musobaqalarini tashkil etishda hamkorlikni rivojlantirish, ShHT davlatlari oʻrtasida sport sohasida istiqbolli loyihalarni amalga oshirish, davlatlar va hududlararo aloqalarni mustahkamlash masalalari muhokama qilinadi.