Toshkent ShHTga aʼzo mamlakatlarning sport sohasidagi mutasaddilarini qarshi olmoqda
Maʼlum qilganimizdek, ertaga poytaxtimizda ShHTga aʼzo davlatlarning jismoniy tarbiya va sport boʻyicha vazirlik va idoralari rahbarlarining yigʻilishi oʻz ishini boshlaydi. Ayni paytda ushbu tadbirda ishtirok etuvchi mehmonlarning Toshkentga tashrifi davom etmoqda.
Bugun Qirgʻiziston Respublikasi Madaniyat, axborot, sport va yoshlar siyosati vaziri Azamat Jamankulov boshchiligidagi delegatsiya kutib olindi. Mehmonlarni Islom Karimov nomidagi Toshkent xalqaro aeroportida oʻtgan tadbirda Sportni rivojlantirish vazirining maslahatchisi Avaz Karimov, Oʻzbekiston Milliy Olimpiya qoʻmitasi mutasaddilari qarshi olishdi.
Kecha tunda Pokiston viloyatlararo muvofiqlashtirish federal vaziri, mamlakat sport kengashi rahbari Ehson ur Rahmon Mazari boshchiligidagi delegatsiya kutib olindi. Kun davomida yana bir qancha mamlakatlardan yigʻilish ishtirokchilari yetib kelishadi. Eslatib oʻtamiz, dastur doirasidagi asosiy tadbir 20-may kuni boʻlib oʻtadi.
