Bugun yunon-rum kurashi boʻyicha Oʻzbekiston terma jamoasi bosh murabbiyi Ravshan Roʻziqulov oʻz tavallud ayyomini nishonlamoqda.

Ravshan Roʻziqulov 1985-yil 18-may kuni Toshkentda tugʻilgan. Sportchilik faoliyatida Doxa-2006 Osiyo oʻyinlari, Osiyo chempionatlari sovrindori boʻlgan va jahon chempionatlarida ham bir necha bor yurtimiz sharafini munosib himoya qilgan. U kishining murabbiylik faoliyati terma jamoamiz tarixida keskin burilish yasadi deb bemalol ayta olamiz. 2019-yilgi jahon chempionatida “klassik” kurashchilarimiz umumjamoa hisobida ikkinchi oʻrinni band etishdi. Mana shunday yuqori natijalar samarasi oʻlaroq Ravshan Roʻziqulov 2019-yil “Milliy sport mukofoti” tanlovida “Yilning eng yaxshi murabbiyi” nominatsiyasida gʻolib boʻldi.

Oʻzbekiston Milliy Olimpiya qoʻmitasi Ravshan Roʻziqulovni bugungi tavallud ayyomi bilan tabriklab, unga uzoq umr, sihat-salomatlik tilab qoladi.