Barselona qatorasiga ikkinchi yil chavandozlarimiz uchun oʻz bagʻrini ochadi
Konkur boʻyicha Oʻzbekiston terma jamoasi vakillari Qirgʻizistonning Bishkek shahrida oʻtkazilgan Yevrosiyo ligasining Millatlar kubogi bahslarida muvaffaqiyatli ishtirok etishdi. Uch kun davom etgan bellashuvlar yakunida hamyurtlarimiz 7 ta oltin, 3 ta kumush va 2 ta bronza medallariga sazovor boʻldilar.
Bundan avvalgi bahslarda yakkalik dasturida chavandozlarimiz Gran-pri yoʻnalishida gʻalaba qozonib, kelasi yil AQSHda oʻtkaziladigan Jahon kubogining finaliga yoʻl olgani haqida maʼlum qilgan edik. Quvonarlisi, jamoaviy dasturda ham yigitlarimizga teng keladigani topilmadi. Ushbu gʻalaba ularga joriy yil Ispaniyaning Barselona shahrida oʻtkaziladigan jamoaviy dasturdagi Jahon kubogi finali eshigini ochdi. Taʼkidlash joiz, chavandozlarimiz qatorasiga ikkinchi yil Jahon kubogining hal qiluvchi bosqichiga yoʻl olishmoqda.
Oʻzbekiston Milliy Olimpiya qoʻmitasi Oʻzbekiston yilqichilik va ot sporti federatsiyasi va chavandozlarimizni qoʻlga kiritilgan ushbu ajoyib gʻalaba bilan tabriklab, ularga kelgusida ham ulkan muvaffaqiyatlar tilab qoladi.
