Shu kunlarda Chirchiq shahrida zamonaviy beshkurash bo‘yicha O‘zbekiston kattalar va yoshlar terma jamoasi qo‘shma o‘quv-mashg‘ulot yig‘inini o‘tkazmoqda. 11 mayga qadar davom etadigan mashg‘ulotlarga 16 nafar sportchi jalb etilgan.

Mashg‘ulotlar 6 nafar trener boshchiligida olib borilmoqda. Sportchi va murabbiylarning geografiyasiga nazar tashlaydigan bo‘lsak, Qoraqalpog‘iston Respublikasi, Andijon, Qashqadaryo, Toshkent viloyati va poytaxtimiz vakillarini uchratish mumkin. Mashg‘ulotlarda asosan yoshlarning jismoniy salohiyatlarini kuchaytirish, sport turlaridan qilichbozlik va o‘q otishdagi qobiliyatlarini oshirishga katta urg‘u qaratilmoqda.

Murabbiy Vadim Chudnovskiy boshchiligida olib borilayotgan yig‘in sportchilarimizni joriy yil kutib turgan qit’a birinchiligi, qolaversa, Parij-2024 Olimpiadasi, “Toshkent-2025” yoshlar Osiyo o‘yinlari va Dakar-2026 yoshlar Olimpiadasiga tayyorlashga qaratilgan.