Osiyo chempionatining birinchi kunini uchta medal bilan yakunladik
Mo‘g‘uliston poytaxtida sport kurashlari bo‘yicha qit’a birinchiligining dastlabki kun bellashuvlari ortda qoldi. Unda terma jamoamizning uch nafar vakili shohsupaga ko‘tarildi.
Polvonlarimizdan Jalgasbay Berdimuratov -87 kg vazn toifasining finalida eronlik Nosir Alizoda bilan murosasiz bahs olib bordi. Afsuski, bellashuvda eronlik kurashchi 3:1 hisobida ustun keldi va Berdimuratov kumush medal bilan taqdirlandi.
Shuningdek, bronza medali uchun gilamga chiqqan Mo‘minjon Abdullayev (-130 kg) va Jasurbek Ortiqboyev (-55 kg) o‘z raqiblarini mag‘lub etib, shohsupaga ko‘tarilishdi.
G‘oliblikka asosiy da’vogarlardan sanalgan Islom Bahromov (-63 kg) bronza medali uchun kurashish bosqichida, Aram Vardanyan (-77) esa dastlabki davrada imkoniyatni boy berib, ushbu musobaqadagi ishtiroklarini yakunladilar.
Shu tariqa, qit’a birinchiligining birinchi kunida terma jamoamiz 1 ta kumush va 2 ta bronza medallariga sazovor bo‘lishdi.
