Bugun mahoratli taekvondochimiz, Osiyo o‘yinlari finalchisi Madinabonu Mannopova o‘z tavallud ayyomini nishonlamoqda.

Madinabonu Mannopova 2001 yil 13 aprel kuni Toshkent shahrida tug‘ilgan. Madinabonu yosh bo‘lishiga qaramasdan bir qator muvaffaqiyatlarga erishib ulgurgan. Jumladan, 17 yoshida 2018 yil Indoneziyada o‘tgan Osiyo o‘yinlarida kumush medalni, shu yili Vetnamda kattalar o‘rtasidagi Osiyo chempionatida bronza medalini qo‘lga kiritdi. 2019 yil Xitoyning Uxan shahrida o‘tgan Harbiylar o‘yinlarida shohsupaning eng yuqori pog‘onasiga ko‘tarilgan bo‘lsa, 2021 yil Livan mezbonligidagi qit’a birinchiligida o‘z kolleksiyasini yana bir kumush medal bilan boyitdi.

O‘zbekiston Milliy Olimpiya qo‘mitasi Madinabonuni bugungi tavallud ayyomi bilan tabriklab, unga mustahkam sog‘lik va ulkan g‘alabalar tilab qoladi.