BAAda qilichbozlik bo‘yicha o‘tkazilayotgan o‘smirlar va yoshlar o‘rtasidagi jahon chempionati bugun yakuniga yetadi. Biz uchun tarixiy musobaqaga aylanib ulgurgan chempionatda terma jamoamiz vakillari yana bir medal qo‘lga kiritishga yaqin.

Reglamentga ko‘ra, bugun jamoaviy dasturdagi bahslar bilan turnir yakunlanadi. Unda qizlarimiz chorak final yo‘llanmasini qo‘lga kiritishdi. Ikkinchi saralangan jamoa sifatida ishtirok etayotgan sportchilarimiz dastlab Avstraliyani 45:34, so‘ng Janubiy Koreyani 45:39 hisobida mag‘lubiyatga uchratishdi. Endi ular chorak finalda shvetsiyalik raqibalariga qarshi maydonga chiqishadi.

Afsuski, yigitlarimiz ikkinchi bosqichda Bolgariyaga 40:45 hisobida mag‘lubiyatga uchrab, medallar uchun kurashni erta tark etishdi.

Bo‘lajak bellashuvlarda shpagachi qizlarimizga omad tilaymiz!