3 Aprel 2022
2323
Alisher Yusupov Antalya “Katta dubulg‘a” musobaqasining kumush medali sohibiga aylandi
Turkiyada dzyudo bo‘yicha Antalya “Katta dubulg‘a” turniri o‘z yakuniga yetdi. Musobaqaning so‘nggi bellashuvida hamyurtimiz Alisher Yusupov gruziyalik Guram Tushishvili bilan chempionlik uchun bahs olib bordi.
Eng og‘ir vazn toifasida kurashgan polvonimiz dastlab vazari ishlashga muvaffaq bo‘ldi. Biroq bahs o‘rtasida tajribali raqib, Tokio-2020 finalchisi, jahon chempioni ippon bahosi bilan bellashuvni foydasiga hal qildi.
Shu tariqa, delegatsiyamiz Antalya “Katta dubulg‘a” musobaqasini 2 ta kumush va 3 ta bronza, jami 5 ta medal bilan yakunladi. O‘zbekiston Milliy Olimpiya qo‘mitasi ushbu muvaffaqiyat bilan O‘zbekiston dzyudo federatsiyasi va jamoamizni tabriklaydi.
