Xabaringiz bor, 24-29-mart kunlari Tojikiston poytaxti velosportning shosse yoʻnalishidagi Osiyo chempionatiga mezbonlik qildi. Unda muvaffaqiyatli ishtirok etgan sportchilarimiz bugun poytaxtimizda munosib kutib olindi.

Velosportchilarimizni qutlash boshqa sport turlariga qaraganda oʻzgacha oʻtdi. Mutasaddilar musobaqa qahramonlarini “Bunyodkor” stadionida qarshi olishdi. Marosimda MOQ raisi oʻrinbosari Sherzod Tashmatov, Kozim Oʻrinboyxoʻjayev boshchiligidagi Oʻzbekiston velosiped sporti federatsiyasi vakillari, Oʻzbekiston Respublikasi Sportni rivojlantirish hamda Mudofaa vazirligi xodimlari, sportchilarimizning yaqinlari ishtirok etishdi.

Qitʼamizning 23 mamlakatidan tashrif buyurgan sportchilar bilan kechgan raqobatda hamyurtlarimiz 5 ta oltin, 1 ta kumush va 2 ta bronza medallarini qoʻlga kiritib, umumjamoa hisobida ikkinchi oʻrinni egallashgan edi. Qayd etish joiz, bu jamoamizning Osiyo chempionatlari tarixidagi eng yaxshi natijasi boʻldi.

Marosimda mutasaddilar sportchilarimizni ushbu ulkan muvaffaqiyat bilan qutlab, ularga kelgusi musobaqalarda, jumladan joriy yil Xanchjou shahrida oʻtadigan Osiyo oʻyinlarida ham chempionlik shohsupasiga koʻtarilishlarini tilashdi.