Oʻmon Milliy Olimpiya qoʻmitasi oʻzbek sporti yutuqlarini eʼtirof etdi
Oʻzbekistonning Oʻmon sultonligidagi elchixonasi xodimlari Oʻmon Milliy Olimpiya qoʻmitasi raisi Shayx Xolid bin Muhammad al-Zubair bilan uchrashishdi, deya xabar bermoqda “Dunyo” AA.
Suhbat davomida ikki mamlakat oʻrtasida sport sohasidagi hamkorlikni yanada rivojlantirish, sport delegatsiyalarining oʻzaro safarlari doirasini kengaytirish, hamkorlikda qoʻshma oʻquv-mashgʻulot yigʻinlarini tashkil etish bilan bogʻliq masalalar atroflicha muhokama qilindi.
Shayx Xolid bin Muhammad al-Zubair Oʻzbekiston jahon va Osiyo qitʼasidagi yetakchi sport mamlakatlaridan biri ekanini alohida taʼkidladi. “Oʻzbekiston xalqaro sport reytingida oʻziga xos mavqega ega. Shu nuqtayi nazardan, Oʻmon Oʻzbekiston bilan sport sohasida hamkorlik koʻlamini yanada faollashtirishdan manfaatdordir”, dedi u.
Eslatib oʻtamiz, Oʻzbekiston va Oʻmon sultonligi MOQlari oʻrtasida 2021-yilning 26-mart kuni hamkorlik memorandumi imzolangan boʻlib, u boʻyicha qator ishlar olib borilmoqda. Endilikda ushbu aloqalarni rivojlantirish maqsadida ikki mamlakatning tegishli sport federatsiyalari oʻrtasida aloqalarni mustahkamlash, oʻzaro kelishuv memorandumi loyihasini tayyorlash va imzolash toʻgʻrisida ham oʻzaro fikr almashildi.
Ushbu memorandum sportchi va hakamlar mahoratini oshirish, tajriba almashish, sport mutaxassislari tayyorlaydigan oliy taʼlim muassasalari oʻrtasida turli dasturlarini amalga oshirish imkoniyatini beradi.
