Chexiya poytaxti Praga shahrida oʻtkazilgan dzyudo boʻyicha Yevropa ochiq chempionati ishtirokchilari uchun mezbonlar xalqaro oʻquv-mashgʻulot yigʻinini tashkil etib berishdi. Unda deyarli barcha ishtirokchi davlat terma jamoalari qatnashishyapti va tabiiyki, ular orasida bizning sportchilar ham bor. Mashgʻulotlar atletlar orasida xalqaro tajriba almashish, terma jamoalar oʻrtasida oʻzaro aloqalarni mustahkamlash yoʻlida xizmat qilmoqda.

Ahamiyatlisi, unda dzyudochilarimiz terma jamoamiz murabbiylar shtabiga yangi qoʻshilgan Marko Shpitka qoʻl ostida shugʻullanishyapti. Mazkur yigʻin oy yakunida Turkiyada oʻtadigan Antalya “Katta dubulgʻa” turniriga tayyorgarlik vazifasini oʻtab beradi.