Tehronda taekvondo bo‘yicha "Fajr Open" xalqaro musobaqasi boshlandi. Dastlabki kungi bahslarda O‘zbekiston terma jamoasining ikki nafar vakili ishtirok etdi.

-53 kg vazn toifasida Charos Qayumova finalga qadar yetib bordi va eronlik taekvondochi Naxid Kiyanichandexga 6:7 hisobida yutqazib qo‘yib, kumush medal sohibasiga aylandi. Shuningdek, -62kg vazn toifasida Ozoda Sobirjonova ham finalga chiqib, eronlik Kosar Asasexga imkoniyatni boy berib qo‘ydi va u ham kumush medal bilan taqdirlandi.

Ertaga, 7 mart kuni Svetlana Osipova, Iroda Mirtadjiyeva, Feruza Sadikova hamda Dinora Muxtorova musobaqada ishtirok etishadi.