Turkiyaning Istanbul shahrida sport kurashlari bo'yicha xalqaro musobaqa yakunlandi. So'nggi kun dasturida erkin kurashchilarimiz medallar uchun kurash olib borishdi.

Finalgacha barcha raqiblarini mag'lub etgan G'ulomjon Abdullayev (-61 kg) hal qiluvchi bellashuvda hindistonlik Ravi Kumarga 10:11 hisobida imkoniyatni boy berib qo'ydi va kumush medal bilan taqdirlandi.

Bronza medali uchun kechgan bellashuvlarda kurashchilarimiz dramatik g'alabani qo'lga kiritishdi. Dastlab Umidjon Jalolov (-65 kg) mo'g'ulistonlik raqibini 5:4 hisobida mag'lub etdi. Keyin esa Tokio-2020 sovrindori Bekzod Abdurahmonov fransiyalik kurashchi bilan kechgan bahsda so'nggi ochkoni qo'lga kiritganlikdagi ustunlik (4:4) evaziga g'alabani o'z tomoniga og'dirdi.

Eslatib o'tamiz, yunon-rum kurashchilarimiz musobaqada 3 ta oltin va 1 ta bronza medallarini jamg'arishgan edi.