Turkiyaning Istanbul shahrida sport kurashlari bo‘yicha start olgan xalqaro musobaqaning birinchi kuni polvonlarimiz uchun omadli o‘tdi. Unda gilamga chiqqan hamyurtlarimiz 3 ta oltin va 1 ta bronza medaliga sazovor bo‘lishdi.

Dastlab Islomjon Bahromov (-63 kg) finalda o‘tgan yilgi jahon chempioni moldovalik Viktor Chiobanuga hech qanday imkoniyat qoldirmadi (9:0). Shundan so‘ng -67 kgda Mahmud Baxshulloyev va -97 kgda Rustam Assakalov ham final bahslarini muvaffaqiyatli o‘tkazib olishdi. Shuningdek, eng og‘ir vazn toifasida Mo‘minjon Abdullayev (-130 kg) bronza medali uchun kechgan bahsda g‘alaba qozonib, sovrindorlar qatoridan joy oldi.

Finallar:
-63 kg: Islomjon Bahromov – Viktor Chiobanu (Moldova) 9:0
-67 kg: Mahmud Baxshulloyev – Morten Torezen (Norvegiya) 5:2
-97 kg: Rustam Assakalov – Arvi Savolaynen (Finlyandiya) 5:1

Bronza medali uchun:
-130 kg: Mo‘minjon Abdullayev – Alimxan Sizdikov (Qozog‘iston) 4:1

Tabiiyki, bunday muvaffaqiyatli ishtirokdan so‘ng Ravshan Ro‘ziqulov boshchiligidagi yigitlarimiz umumjamoa hisobida peshqadamlik qilishmoqda.