“Ichan qal’a”da ommaviy sport bayrami
Yurtimiz har qanday insonni o‘z go‘zalligi bilan lol qoldiradigan tarixiy obidalarga boy. Ulardan biri Xiva shahridagi jahonga mashhur “Ichan qal’a” majmuasi. Mahalliy mutasaddilar uning qarshisida, aniqrog‘i “Ochiq osmon ostidagi muzey” nomi bilan mashhur maskanda viloyat yoshlari uchun chiroyli ommaviy sport bayramini tashkil etib berishdi.
Ota darvozasi oldida o‘tgan tadbirda sportga oshno tutingan ko‘plab yoshlar taekvondo, o‘zbek milliy kurashi kabi yo‘nalishlarda ko‘rgazmali chiqishlarini namoyish etishdi. Shubhasiz, bunday tadbir shahar aholisi, ayniqsa, yoshlarning e’tiborini o‘ziga tortdi. Ta’kidlash joiz, bu kabi ommaviy tadbirlarning muntazam o‘tkazilishi uyushmagan yoshlarning sportga bo‘lgan qiziqishlarini yanada oshirishi, qolaversa sog‘lom turmush tarzi targ‘iboti yo‘lida muhim ahamiyat kasb etadi.
