Uzoq yillar oʻzbek sporti, xususan, futbolining rivojiga ulkan hissa qoʻshgan inson Elmar Aminov 90 yoshga toʻldi.

Elmar Alimovich Aminov 1932-yil 23-yanvar kuni Fargʻonada dunyoga kelgan. 1959-yil Oʻzbekiston futbol federatsiyasiga asos solinganida, Elmar Alimovich ushbu tashkilotning rahbari etib tayinlangan. U inson faoliyati davomida “Paxtakor” jamoasi boshligʻi, keyinchalik Oʻzbekiston SSR Ministrlar Kengashi davlat jismoniy tarbiya va sport qoʻmitasi muovini, soʻngra rahbari lavozimlarida ishladi. U kishi faoliyati davomida futbol boʻyicha Sobiq Ittifoq terma jamoasi delegatsiyasiga koʻplab musobaqalarda, jumladan, 1966-yil Angliyada boʻlib oʻtgan jahon chempionatida rahbarlik qilgan. 1990-1992-yillarda Oʻzbekiston futbol federatsiyasining birinchi vitse-prezidenti sifatida faoliyat olib borgan.

Oʻzbekiston Milliy Olimpiya qoʻmitasi Elmar Aminovni ushbu ulugʻ yoshi bilan muborakbod etib, u kishiga uzoq umr va sihat-salomatlik tilab qoladi.