Tokioda Ulugʻbek Rashitovga yengilgan taekvondochi oʻz yurtida sovringa ega boʻldi
Janubiy Koreyalik afsonaviy taekvondochi Li De-Xun Tokio-2020 Olimpiya oʻyinlaridan soʻng katta sportdagi faoliyatini yakunlagan edi. Mamlakat milliy federatsiyasi tomonidan oʻtkazilgan yil sarhisobida unga uzoq yillik faoliyati uchun maxsus sovrin topshirildi.
Eslatib oʻtamiz, Li De-Xun Tokio-2020 Olimpiya oʻyinlarida ikkinchi davrada boʻlajak chempion, hamyurtimiz Ulugʻbek Rashitovga 19:21 hisobida imkoniyatni boy bergan va yakunda bronza medali uchun bahsda xitoylik sportchiga magʻlub boʻlgan edi. Uning hisobida jahon chempionatlarining 3 ta oltin va 1 ta bronza, shuningdek, London-2012 Olimpiadasining kumush, Rio-2016 Olimpiadasining esa bronza medallari mavjud.
Marosimda “Yil sportchisi” maxsus sovrini Tokio-2020 Olimpiadasida +67 kg vazn toifasida kumush medalni qoʻlga kiritgan Li Dabinga topshirildi.
