Yaqinlashib kelayotgan Pekin-2022 qishki Olimpiya oʻyinlarining ochilish marosimi millionlab muxlislar intiqib kutayotgan tadbirlardan biri. Tashkilotchilar tadbirning barcha qismini ochiqlamayotgan boʻlsalar ham, tomoshabinlarni yanada qiziqtirish uchun baʼzi maʼlumotlarni aytishmoqda. Jumladan, Olimpiya oʻyinlarining ochilish va yopilish marosimi direktori, kinorejissyor Chjang Imou bu borada barchada kuchli intriga uygʻotadigan fikrlarni bildirdi:

“Hozir barcha sirlarni oshkor qila olmayman. Biroq shuni aytishim mumkinki, mashʼala yoqish marosimi chinakam inqilob boʻladi. Biz tarixdagi ekologik eng toza Olimpiadani oʻtkazishga harakat qilyapmiz. Ishonchim komilki, bunday marosimni dunyo ahli yaqin 100-yil ichida koʻrmagan”, – deydi mutaxassis.

Maʼlumot uchun, XXIV qishki Olimpiya oʻyinlarining ochilish marosimi 4-fevral kuni Toshkent vaqti bilan soat 17:00 da boshlanishi va 1 soat, 40 daqiqa davom etishi belgilangan.