Gruziyaning Tbilisi shahrida qilichbozlikning sablya yoʻnalishi boʻyicha Jahon kubogi turniri boshlandi. Ayollar dasturida hamyurtimiz Zaynab Dayibekova (22, reytingdagi oʻrni) medallar uchun kurashish imkoniyatini saqlab qoldi.

Yuqori reytingi sabab qoraqalpogʻistonlik hamyurtimiz 1/64 final bosqichidan bahslarga qoʻshilmoqda. Afsuski, start olgan barcha yosh vakillarimiz saralashda imkoniyatni boy berib qoʻyishdi. 1/32 finalga yoʻl olish uchun Dayibekova fransiyalik Amaliya Emini (43) magʻlubiyatga uchratishi kerak.

Zaynab ushbu raqib toʻsigʻidan oʻta olsa, yaponiyalik Norika Tamura (11) hamda italiyalik Eliza Passaro (54) bahsi gʻolibi bilan toʻqnash keladi. Boʻlajak bahslarda yurtdoshimizga omad va zafarlar tilab qolamiz.