Shu kunlarda futbol boʻyicha Oʻzbekiston terma jamoasi oʻyinchilari MOQ qoshidagi Respublika sport tibbiyoti ilmiy-amaliy markazida tibbiy koʻrikdan oʻtishdi. Jarayonni MOQ raisining birinchi oʻrinbosari, OʻFA birinchi vitse-prezidenti Ravshan Irmatov ham kuzatib borib, futbolchilarimizning salomatligini koʻzdan kechirdi.

“3 kun davomida 24 nafar futbolchimizni tibbiy koʻrikdan oʻtkazishga muvaffaq boʻldik. Bu orada ulardan umumiy tahlillar olinib, oʻyinchilar EKG va tor mutaxassislar koʻrigidan oʻtishlari barobarida yuklama berilganda organizmlarida, ayniqsa, yurak sohasidagi oʻzgarishlarni koʻrsatib turadigan zamonaviy texnikalardan ham foydalanildi. Dam olish kunlari boʻlishiga qaramay qimmatli vaqtlarini ayamay bizga yordam bergan Markaz shifokorlariga minnatdorchilik bildirib qolamiz”, – dedi jamoa shifokori Alisher Aripov.

Maʼlum qilinishicha, terma jamoa legionerlari kelgusi yigʻin doirasida Toshkentga kelishgach tibbiy koʻrikdan oʻtkaziladi.