Bugundan poytaxtimizdagi “Yunusobod sport majmuasi” hamda “Universal” sport saroylarida ikki ajoyib sport turlarida kattalar oʻrtasidagi mamlakat chempionati boshlanadi.

21-23-dekabr kunlari “Yunusobod sport majmuasi”da yurtimizning eng kuchli dzyudochilari mamlakat birinchiligi uchun bahs olib borishadi. Unda Tokio-2020 sovrindori Davlat Bobonovdan boshqa hamma yetakchilar ishtirok etishi bu yilgi chempionat intrigasi har qachongidan ham katta boʻlishidan dalolat bermoqda. Bugun erkaklar -60 va -66 kg, qizlar -48, -52 va -57 kg vazn toifalarida bellashishadi.

Shuningdek, “Universal”da erkin va yunon-rum kurashi boʻyicha Respublika birinchiligi oʻtkaziladi. 21-24-dekabr kunlari oʻtadigan musobaqada Respublikamizning barcha hududlaridan tashrif buyuradigan polvonlar gilamda oʻz mahoratini namoyish etishadi. Bugun soat 16:00 da musobaqaning tantanali ochilish marosimi boʻlib oʻtadi.

Barcha sport muxlislarini, OAV vakillarini mazkur bellashuvlarni tomosha qilishga chorlab qolamiz.