Yigʻilish davomida ishtirokchilar bilan koʻtarilgan mavzular boʻyicha atroflicha fikr almashildi.
16 Dekabr 2021
1845
Respublika sport tibbiyoti ilmiy-amaliy markazining Xanchjou-2022 Osiyo va Parij-2024 Olimpiya oʻyinlariga tayyorgarlik rejasi muhokama qilindi
Bugun MOQ qoshida faoliyat olib borayotgan Respublika sport tibbiyoti ilmiy-amaliy markazining Xanchjou-2022 Osiyo va Parij-2024 Olimpiya oʻyinlariga olib boradigan tayyorgarlik rejalariga bagʻishlangan yigʻilish boʻlib oʻtdi. Tadbirda MOQ rahbari Rustam Shoabdurahmonov va uning oʻrinbosari Sherzod Tashmatov, RSTIAM direktori Abdushukur Sadikov, markaz shifokorlari, shuningdek, federatsiya va assotsiatsiyalarimizda faoliyat olib borayotgan ushbu soha mutaxassislari ishtirok etishdi.
Yigʻilishni MOQ raisi ochib berdi va sohaning oʻzbek sporti taraqqiyotida tutgan oʻrni haqida toʻxtalib oʻtdi.
“Tokio-2020 Olimpiya oʻyinlari siklida juda murakkab sharoitda tayyorlandik. Shu oʻrinda, pandemiya davrida koʻrsatayotgan ulkan xizmatlaringiz uchun yana bir bor tashakkur aytib oʻtmoqchiman. Hozirgi vaziyat ham oson emas. Yangicha shtamm va kasalliklar tarqalib, ishimizni murakkablashtirmoqda. Prezidentimizning qoʻllab-quvvatlashi bilan federatsiyalarimizda shifokorlardan tashqari diyetolog, psixolog va massajchi shtat birliklari tashkil etilib, ular toʻliq moliyalashtirildi. Kelgusida ham ana shunday kompleks tayyorgarlikni davom ettiramiz. Unutmang, yurtboshimiz barpo etayotgan Yangi Oʻzbekiston rivojida sport tibbiyotining ham alohida oʻrni bor”, – dedi Rustam Shoabdurahmonov.
Oʻz navbatida MOQ rahbariyati tomonidan sohada mavjud muammo va kamchiliklarni oʻrgangan holda ularni bartaraf etish, mahalliy sharoitda farmatsevtika yoʻnalishini rivojlantirish, bazalardagi nazoratni yanada kuchaytirish, yangicha metodikalarni keng tatbiq qilish boʻyicha topshiriq berildi.
Shundan soʻng Abdushukur Sadikov oʻtgan Olimpiya oʻyinlari siklida markaz faoliyati boʻyicha hisobotni oʻqib eshittirdi va yangi rejalar haqida oʻrtoqlashdi. Unga koʻra, kelgusi yil 1-yanvar kunidan boshlab markazda har kuni 24 soat ishlaydigan “call-centre” faoliyati yoʻlga qoʻyiladi. 1193 raqami bilan bogʻlaniladigan ushbu markaz nafaqat terma jamoalarimiz, balki fuqarolarimiz uchun ham xizmat qilib, oʻz tarkibida umumiy yoʻnalish, psixolog va boshqa tor doiradagi mutaxassislarni jamlaydi.
