Faxriy kurashchimiz jahon chempionatida sovrindor bo‘ldi
Ayni kunlarda Gretsiyaning Lutraki shahrida erkin va yunon-rum kurashi bo‘yicha faxriylar o‘rtasidagi jahon chempionati bo‘lib o‘tmoqda.
Bir nechta yosh toifasida o‘tkazilayotgan dunyo birinchiligida Ziyodulla Abdullayev murabbiyligidagi uch nafar erkin va yunon-rum kurashchilarimiz yurtimiz sharafini himoya qilmoqda. Erkin kurash bahslarida Abdujalil Abdurahmonov (-62 kg) va Usmonjon Yusupov (-88 kg), yunon-rum kurashi bellashuvlarida Sanjar Umarxo‘jayev (-100 kg) gilamga chiqadi.
Quvonarlisi, yaqindagina o‘zining 56 yoshini qarshilagan Abdujalil Abdurahmonov o‘z toifasida, ya’ni 40 yoshdan oshganlar bahsida jahon chempionatining bronza medalini qo‘lga kiritdi. Abdurahmonov rossiyalik Gerasim Dyakonovni 5-0, AQSh vakili Jeffrey Mallettni 4-0 hisobida yengdi. Yarim finalda moldovalik Boris Savvaga yutqazib qo‘ydi. Bronza medali uchun kechgan bellashuvda esa armanistonlik Jora Xovannisyanni 3-0 hisobida taslim etdi. Ushbu vazn toifasida Boris Savva jahon chempioni bo‘ldi.
Bugun Usmonjon Yusupov medallar uchun kurashga kirishadi. Uning ilk bosqichdagi raqibi qirg‘izistonlik Roman Saribayev bo‘ladi.
