Toshkent tumanidagi arena chavandozlarimiz uchun qayta ta’mirlandi
Toshkent viloyatining Toshkent tumanida joylashgan “Furqon” ot sporti klubi qayta ta’mirlanib, foydalanish uchun topshirildi.
Hukumatimizning ko‘magi bilan ot sportini yanada rivojlantirish bo‘yicha bir qator ishlar amalga oshirilmoqda. So‘nggi paytlar foydalanishga yaroqsiz bo‘lib qolgan “Furqon” ot sporti klubining rekonstruksiya qilinishi chavandozlarimiz uchun chinakam bayramga aylandi. Tantanali ochilish marosimida O‘zbekiston yilqichilik va ot sporti federatsiyasi raisi Bahromjon Gaziyev, O‘zbekiston Respublikasi Milliy Gvardiyasi mutasaddilari va sport jamoatchiligi vakillari ishtirok etishdi.
Marosim doirasida yoshlar va kattalar o‘rtasida konkur bo‘yicha musobaqa ham o‘tkazildi. Shuningdek, kechaning shou dasturi 190 sm balandlikdagi to‘siqdan o‘tish dasturi bo‘ldi. Yakunda tadbir ishtirokchilari, g‘olib va sovrindorlarga esdalik sovg‘alari topshirildi.
