Tohir Gulyamov va Rasuljon Abdurahimovni tabriklaymiz!
Bugun o‘zbek sportining ikki yorqin vakillari sport kurashlari bo‘yicha xalqaro toifadagi hakam Tohir Gulyamov hamda gimnastikachimiz Rasuljon Abdurahimov tavallud ayyomlarini nishonlashmoqda.
Tohir Gulyamov 1961-yil 3-oktyabr kuni tug‘ilgan. Sport kurashlari bo‘yicha Olimpiya darajasidagi hakam Toxir Gulyamov faoliyati davomida Pekin, Rio, Tokio Olimpiadalarida, 23 ta jahon chempionati va 22 ta Osiyo chempionatida, 6 bor Osiyo o‘yinlarida ishlagan. 2014-yilgi jahon chempionatida eng yaxshi referiga atalgan “Oltin hushtak” sohibi. Tohir Gulyamov “Milliy sport mukofoti-2019” tanlovida “Yilning eng yaxshi hakami” nominatsiyasida g‘olib bo‘lgan.
Abdurahimov Rasuljon Shuhrat o‘g‘li 1996-yil 3-oktyabr kuni Farg‘ona shahrida tavallud topgan. Respublika Olimpiya zaxiralari kolleji tarbiyalanuvchisi. 2009-yildan sport gimnastikasi bo‘yicha O‘zbekiston terma jamoasi a’zosi. 2019(yil oktyabr oyida Germaniyaning Shtutgart shahrida o‘tgan sport gimnastikasi bo‘yicha jahon chempionatida muvaffaqiyatli ishtiroki bilan Tokio-2020 Olimpiya o‘yinlariga yo‘llanma olib, unda yurtimiz sharafini himoya qilib keldi.
O‘zbekiston Milliy Olimpiya qo‘mitasi har ikki vakilimizni tavallud ayyomi bilan tabriklab, ularga uzoq umr, sihat-salomatlik va ulkan muvaffaqiyatlar tilab qoladi.
