Xalqaro Paralimpiya qo‘mitasi prezidenti Endryu Parsons O‘zbekistonga tashrif buyurdi
Xalqaro Paralimpiya qo‘mitasi prezidenti Endryu Parsons O‘zbekiston Milliy Paralimpiya qo‘mitasi raisi Muxtorxon Tashxodjayevning taklifiga binoan yurtimizga keldi.
Martabali mehmonni Islom Karimov nomidagi Toshkent xalqaro aeroportida O‘zbekiston Milliy Paralimpiya qo‘mitasi raisi Muxtorxon Tashxodjayev, O‘zbekiston Respublikasi Turizm va sport vaziri o‘rinbosari Avaz Karimov, O‘zbekiston Milliy Olimpiya qo‘mitasi Bosh kotibi Oybek Kasimov va ko‘plab ommaviy axborot vositalari xodimlari tantanali kutib oldi. O‘z navbatida Endryu Parsons ham O‘zbekistonga ilk tashrifi bu qadar iliq boshlanganidan mamnun ekanini bildirdi.
Eslatib o‘tamiz, Xalqaro Paralimpiya qo‘mitasi prezidentining yurtimizga rasmiy tashrifi 2 oktyabrga qadar davom etadi. Unga qadar martabali mehmon bilan yurtimizda Paralimpiya harakatini rivojlantirishga doir bir qator rasmiy uchrashuvlar o‘tkazish belgilangan.
