Tokio-2020 sovrindori Prezident sovgʻa qilgan xonadonga tashrif buyurdi
Xabar berganimizdek, Tokio-2020 yozgi Olimpiya oʻyinlari gʻolib va sovrindorlariga Prezident Shavkat Mirziyoyev tomonidan sovgʻa qilingan mashina va xonadonlar kaliti topshirilgan edi. Bugun dzyudo boʻyicha Tokio-2020 sovrindori Davlat Bobonov oilasi bilan yurtboshimiz tomonidan sovgʻa qilingan “Trailblazer” avtomobilida ikkinchi mukofot – yangi xonadoniga tashrif buyurdi.
Aytish joiz, Bobonovlar oilasi ushbu sovgʻalardan juda ham xursand va kayfiyatlari aʼlo. Ular taassurotlari bilan oʻrtoqlashar ekan, koʻrsatilayotgan eʼtibor va gʻamxoʻrlik uchun Prezidentimizga oʻzlarining tashakkurlarini aytishdi.
“Olimpiya oʻyinlarida sportchilar oʻz yurti, nomi, oilasi sharafini himoya qiladi. Mening vatanim uchun koʻrsatgan kichik xizmatim mana shunday baholanganidan juda ham baxtiyorman. Kelgusi Olimpiya oʻyinlarida bu menga juda katta motivatsiya beradi”, – dedi Olimpiada sovrindori Davlat Bobonov.
Eslatib oʻtamiz, Tokio-2020 Olimpiadasining bronza medali sohiblariga poytaxtimizda qad rostlayotgan “Greenpark” kompleksidan 2 xonali uy sovgʻa qilindi.
