Любинко Друлович: “Биз мусобақага тайёрмиз”

Хабарингиз бор, бугун Таиландда футбол бўйича U-23 Осиё чемпионати старт олади. Мусобақада иштирок этадиган Ўзбекистон Олимпия терма жамоаси эса эртага Эронга қарши баҳс билан чемпионатдаги иштирокини бошлайди. Бугун мусобақадан аввал матбуот-анжумани бўлиб ўтди. Унда терма жамоамиз устози Любинко Друлович ва гуруҳдаги бошқа жамоалар мураббийлари иштирок этишди.

Любинко Друлович (Ўзбекистон): “С” гуруҳи жуда ҳам қийин квартет бўлди. Тўртала жамоада ҳам имконият бир хил. Биз ҳам учрашувга муносиб тайёргарлик кўрдик. Олдинда бизни Эронга қарши учрашув кутиб турибди. Бу ўйинга ҳозир бор эътиборимиз қаратилган. Ушбу баҳсдан сўнг қолган ўйинлар ҳақида ўйлаймиз.

– Аввало, Ўзбекистон терма жамоасига омад тилайман. Тайёргарлик доирасида маҳаллий иқлим ва озиқ-овқатига мослашишда муаммо бўлмадими? Шунингдек, таркибда Остон Урунов йўқлигига қандай изоҳ айта оласиз?
– Савол ва омад тилаганингиз учун раҳмат. Ҳар бир ўйин осон ўтади дея олмайман. Биринчи бор Таиланддамиз. Шароитдан нолийдиган жойимиз йўқ. Бизга барча шароитларни яратиб беришган. Айни пайтда танлаган футболчиларим Олимпия ёшидаги энг кучлиларидир. Ҳозир таркибда йўқ ўйинчилар ҳақида гапириш бироз ноўрин деб ўйлайман. Биз мусобақага тайёрмиз. Насиб қилса, ҳар бир ўйинда чиройли ва яхши ўйин кўрсатишга ҳаракат қиламиз.

Хак-Бум Ким (Кореа): Мусобақа давомида жуда ҳам қийин учрашувлар кутиб турибди. Барча жамоалар ўзига яраша кучли жиҳатга эга. Ҳар бир баҳс ўзига яраша қийин ўтади. Биз ҳам энг сара футболчиларимизни танлаб келдик ва барча ўйинда бор кучимизни ишга соламиз.

Веи Хао (Хитой): Жамоамиз яхши тайёргарлик кўрди. Ташкилотчилар барча шароитларни яратиб берган. Биз мусобақа давомида барча бор кучимизни ишга соламиз.

Ҳамид Эстили (Эрон): Мезбонларга ва ташкилий қўмитага раҳмат айтиб қолмоқчиман . Гуруҳдаги қолган 3 жамоага ўз ҳурматимни билдириб қоламан. Гуруҳимизда кучли жамоалар жам бўлган. ФИФА тақвими йиғин ва ўртоқлик учрашувларини кўнгилдагидек ўтказишимизга бироз ҳалал берди. Шундай бўлса ҳам биз мусобақада яхши натижа кўрсатишга умид қиламиз. Ўзбекистон терма жамоасини яхши биламиз. Улар билан 2 бор ўртоқлик учрашини ўтказдик. Ўйинчиларим мусобақага тайёргарлик жараёнида қаттиқ меҳнат қилишди. Доим биринчи ўйин қийин бўлади. Шу боис эртангги Ўзбекистонга қарши ўйин ҳам осон кечмайди.

8 Yanvar, 2020|Янгиликлар|