Ўзбекистон учун навбатдаги медаль: Энг ёш спортчимиз бронза медалини қўлга киритди

Аргентинада ўсмирлар ўртасидаги Олимпия ўйинлари давом этмоқда. Бугун мусобақа доирасида гимнастика бўйича микст мусобақалари ўтказилди. Қувонарлиси, беллашувларда Ўзбекистон терма жамоасининг энг ёш спортчиси Индира Ўлмасова (14 ёш) ҳам иштирок этди ва бронза медали соҳибасига айланди.

Баҳсларда жаҳон гимнастикаси афсоналари шарафига номланган жамоалар иштирок этишди. Эътиборлиси, Индира Ўлмасова қуръа натижаларига кўра ўзбекистонлик афсона – Оксана Чусовитина шарафига ном олган жамоа сафида беллашувларда қатнашди. Ушбу баҳсларда спортчилар аралаш жуфтлик, трамполин, бадиий гимнастика, спорт гимнастикаси бўйича кураш олиб боришди. Индира билан биргаликда «Оксана Чусовитина» жамоаси сафида АҚШ, Буюк Британия, Миср, Гватемала, Швеция, Австралия, Япония, Германия, Аргентина ҳамда Грециядан ташриф буюрган спортчилар иштирок этишди. Индира мусобақа давомида таяниб сакраш, брус, ходадаги ва эркин машқлар бўйича чиқиш қилди.

Мусобақада биринчи ўринни «Симона Байлз» жамоаси эгаллади. Иккинчи ўриндан «Макс Уитлок» жамоаси вакиллари жой олишди. «Оксана Чусовитина» жамоаси эса кучли учликка якун ясаб берди.